Arratsalde on denoi,

Gaur arte ez nekien arren, 2025eko abenduan EHUko Errektoretzak “Euskarazko Doktoregoa” deituriko aipamen bat onartu omen zuen. Gaur DOKe Zuzendaritzatik aplikatzeko bideen berri eman digute.

Aipamen honen lorpenerako baldintzen artean, Tesiaren idazketa eta defentsa 100% euskaraz egitea (nazioarteko tesietan defentsa euskaraz eta atzerriko hizkuntzan), doktoregaiak hizkuntza-formazioetan parte hartu izana eta (hau garrantzitsua) doktoregaiak aipamen hau espreski eskatzea jasotzen dira. Jarraipena Euskara alorreko errektoreordetzaren gain jartzen da, eta aipamena onesteko epaimahaiaz ere hitz egiten da. Horrez gain, eskaeraren tokian zuzendarien euskara akreditazioa ere eskatzen du, araudian agertzen ez den arren, jarraipenerako irizpide bezala joka dezakeela suposatzen dut.

Araudia guztia hemen, 38. eta 39. artikuluetan aipamena: https://www.ehu.eus/documents/d/euskara/ehuko-doktoregoko-ofizialen-irakaskuntzak-kudeatzeko-erreglamentua

Ez dut aurkitu Errektoretzaren adierazpen publikorik aipamena azaltzen, ez dakit norbaitek zerbait gehiago badakien. Gaur gaurkoz, badirudi aurretik ere indarrean zegoen Euskarazko C2a aurkezteko salbuespena izango litzatekeela bere ondorio bakarra. Aitzitik, azpimarratzekoa deritzot “aipamen” kategorian sartu izana Euskerazko tesia eta, gainera, araudian “nazioarteko aipamena” baino lehenago jaso izanak honen proiekzioaz hitz egin diezagukela uste dut. Halaber, arraroa litzateke aipamenari berme formal gehiago jarri izana eta ondorio juridikorik ez izatea.

Ez dakit zer iruditzen zaizuen aldaketa hau, eta “nazioarteko aipamenarekin” gertatzen den bezala, plazen atxikipenerako balio gehigarri bat izan dezakeela uste duzuen, adibidez. Ez dakit beste unibertsitateetan ere badagoen antzeko figurarik. Nik neuk euskarazko ikerketa sustatzeko nahiko bide interesgarria izan daitekeela deritzot.

PD: Argitalpen hau egin bitartean berriz sartu nahi izan dut orrialdean, baina badirudi orain bertan ez dagoela eskuragarri (erroreen bat izango zuen edo). Ea hurrengo egunetan martxan jartzen duten berriz.

PD2: Nire lehenengo argitalpena da sare honetan, eta ez dakit zein den dinamika. Probatzen ikastea erabaki dut jeje.