Kaixo, kuadrila!!!
Hemen duzue liburu-kapituluaren harira Xabier Landabideak igorritako mezua:
UEUkide hori, eguerdi on

Lehenengo eta behin eskerrik asko, duela aste bi Koronabirusak jakintza-eremuetan izan(go) dituen ondoriez elkarrekin liburu forman pentsatzeko proposamena bidali nizuenean ez nuen inola ere hain erantzun azkarra, atsegina eta handia espero. Une honetan dozena bat baiezko jaso ditut: Arkitektura / Hirigintza, Kimika, Literatura, Pedagogia, Psikologia, Hezkuntza – Komunikazioa, Hezkuntza, Artearen Historia, Hizkuntzalaritza eta Soziolinguistika, Hezkuntza eta Teknologia, Ekonomia eta Arte Ederrak. Eskerrik asko bihotzez, hain garai arraro eta zailetan halako proposamen bati baiezkoa emateagatik.

Askok galdetu didazue ekarpenen estilo eta entrega epeen inguruan, eta hori dela eta proposamen zehatzago bat egitera nator, liburua ahalik eta osoena eta interesgarriena izan dadin.

LIBURUAREN IZENBURUA: definitzeko dago eta denon artean joango gara ikusten zein izan behar duen azken forma. Momentuz Oskar Arantzabal kideak proposatutako izenburua luzatu nahi dizuet (“Zientziak eta Humanitateak COVID-19 osteko begirada multidiziplinarretik”) baina horrek ez du esan nahi azkenean horrela geldituko denik. Liburuaren asmoa ondo jasotzen duela iruditu zait , baina behin behinekoa da momentuz 😉

ARTIKULUEN ESTILOA: Estiloa librea izango da, eta irakurle ez-espezializatuak ulertu ahal izateko modukoa egitea eskertuko nizueke, helburua hausnarketa eta dibulgazioa baita. Hala ere denok ondorengo elementuak erabiltzea proposatzen dizuet, estilo aldetik normalizatzeko errazagoa izan dadin. 5-6 orrialde inguruko artikuluak ditugu buruan.
Izenburua (jakintza esparrua bertan islatzeak lagundu dezake agian)
Egileak (Izen-abizenak eta kontaktua. Ez dago egile mugarik)
Laburpena / Abstracta (euskaraz)
Hitz-gakoak (5-6)
Bibliografia (erreferentziatutako eta kontsultarako lanak. 10-15 gehienez). Erreferentzietarako APA estiloa erabiltzea proposatzen dizuet (baina hori nire herren soziala da, borrokatu gaitezke nahi izatera)
ENTREGA EPEAK: Momentuz hamabi lagunen baiezkoa jaso dut, baina ekarpen gehiago biltzen saiatzeko asmoa dut (astun jartzen banaiz halere esaidazue). Hori dela eta bi entrega epe proposatzen dizkizuet. Badakit hilabete gutxitan gauzak asko aldatu daitezkeela, baina liburuaren asmoa ez da ahalik eta testurik profetiko eta zehatzenak egitea, une batetako hausnarketak jasotzea baino. Zentzu horretan agian interesgarria izan daiteke artikuluak noiz jaso ziren adieraziko bagenu (hitzegingo dugu honetaz).
Lehen deialdia: 2020ko ekainak 30. Lehen artikulu batzuk edukitzeak asko erraztuko dit jende gehiago erakarri ahal izatea, zailena lehen saiakera egitea izan ohi baita.
Azken deialdia: 2020ko urriak 30. Hau izango da libururako ekarpenak egiteko azken epemuga, hortik aurrera edizio lanak izango baititugu eskuartean.
Argitalpena 2021 hasierarako pentsatuta daukagu,baina gauzak oso ondo joango balira ez dugu deskartatzen 2020rako aurreratzea. Aurkezpen ekitaldi, mahai inguru eta abarrekoak antolatzea ere interesgarria izan liteke, baina momentuz artikuluen bilduma ahalik eta interesgarriena egiten saiatuko gara.

Bide batez, Jakin-eko lagunak ere “Erraminta kaxa” deituriko ekimen bat antolatzen ari dira COVID-19aren krisiaren aurrean erantzun kontzeptual eta praktikoak batzen saiatzeko. Haiekin ere harremanetan jartzen saiatuko gara ikusteko ea ze aukera zabaltzen zaizkigun kolaboratzeko.

Besarkada handi, handi bana, eta eskerrik asko berriro ere zuen laguntza, denbora eta talentu guztiarengatik.

Txabi