Euskaltzaindiak ortografia-markei buruzko jarraibideak plazaratu berri ditu. Euskaltzaindiaren webgunean irakur daitekeenez, ortografia-markak ezinbestekoak dira testu idatziak zuzen irakurtzen eta interpretatzen laguntzeko.

Kontsultarako planteatu dituzte azalpenok eta hiru ataletan banatu. 1) puntuazio-markak, 2) marka lagungarriak (marratxoa (-)…), eta 3) marka diakritikoak.

Irakasle, ikertzaile, idazle, zuzentzaile, itzultzaile… hizkuntza-kontuetan ari garenontzat oso gai interesgarriak dira. Adibidez (bi aipatzearren), honako argibide hauek ematen ditu arauak:

Koma. Mintzagaia esaldiaren subjektua denean, ez da komarik jartzen subjektuaren ondoren (baina tartekiaren koma-parea jar daiteke).

[EGOKIA] Amaiak liburuak ekarri ditu.

[DESEGOKIA] Amaiak, liburuak ekarri ditu.

[EGOKIA] Amaiak, orduan, liburuak ekarri ditu.

Barra etzana. Barra etzanaren bidez elkartzen diren formak hitz bakar batez edo hitz-zatiz osatuta badaude, ez da zuriunerik uzten barra etzanaren alde banatan:

Bereizketa ez litzateke perpaus iragankor/iragangaitzen artean egingo.

Barra etzanaren bidez elkartzen diren terminoetako batek, gutxienez, hitz bat baino gehiago baditu, zuriune bat uzten da barra etzanaren aurretik eta ondotik, garbi uzteko disjuntzioa ez dagokiela barra etzanaren ondo-ondoan dauden hitzei soilik.

Badira etorri naiz / etorria naiz bezalakoak, eta ikusi ditut / ikusiak ditut moduko bereizketak.

Ortografia-markak Euskara Batuaren Ortotipografia (EBO) egitasmoko bosgarren atala da. Haren aurrekoak hauek dira: Laburtzapenak: laburdurak eta siglak (196. araua), Sinboloak (197. araua), Letra‑estiloak (198. araua) eta Letra larriak eta xeheak (200. araua).

Martxorako zenbait ikastaro antolatu ditu Euskaltzaindiak eta Alfontso Mujika @alfon euskaltzain osoak emango ditu.

euskaltzaindia.eus

Ortografia-markei buruzko jarraibideak plazaratu ditu Euskaltzaindiak

Ortografia-markak Euskara Batuaren Ortotipografia (EBO) egitasmoko bosgarren atala da. Martxoan, dibulgazio-ikastaroak egingo dira.